اِبراهێمئے چَکّاس
22
اے چیزّان و رند، هُدایا اِبراهێم چَکّاسِت*.
گۆن اِبراهێما گوَشتی:
”اِبراهێم!“
اِبراهێما پَسّئو دات:
”جی!“
2 هُدایا گوَشت:
”وتی بَچّ، وتی یکّێن چُکّ، اِساک که ترا دۆست اِنت، بزوری و موریائے دَمگا برئو.
هما کۆها که من ترا پێشَ داران، همۆدا بَر و سۆچَگی کُربانیگئے هسابا نَدری کن.“
3 دومی سُهبا ماهلّه، اِبراهێم پاد آتک و وتی هَری پالام کرت.
وتی دو هِزمتکار و اِساکی زرتنت، په سۆچَگی کُربانیگا داری پرۆشت و دێم په هما جاگها راه گپت که هُدایا گوَشتگاَت.
4 نون سپرئے سئیمی رۆچ اَت.
اِبراهێما چمّ چست کرتنت و چه دورا آ جاگهی دیست.
5 گۆن وتی هِزمتکاران گوَشتی:
”شُما گۆن هرا همِدا بجلّێت، من و چُکّ اۆدا رئوێن و هُدایا پرستشَ کنێن و کاێن.“
6 اِبراهێما سۆچَگی کُربانیگئے دار زرتنت و وتی چُکّ اِساکئے بڈّا داتنت، آس و کارچی وت زُرتنت و دوێن راه گپتنت.
7 اِساکا گۆن وتی پت اِبراهێما گوَشت:
”منی پت!“
اِبراهێما پَسّئو دات:
”جی منی چُکّ!“
اِساکا گوَشت:
”آس و دار وَه اِش اَنت، بله سۆچَگی کُربانیگئے گوَرانڈ کجا اِنت؟“
8 اِبراهێما پَسّئو دات:
”منی چُکّ!
سۆچَگی کُربانیگئے گوَرانڈئے کارا هُدا وت چار و گُزارَ* کنت“ و آ دوێن رئوان بوتنت.
9 وهدے هما جاگها سر بوتنت که هُدایا گوَشتگاَت، اِبراهێما کُربانجاهے اَڈّ کرت، داری سر په سر کرتنت و وتی چُکّ اِساکی بَست و کُربانجاها، دارانی سرا اێر کرت.
10 اِبراهێما دست شهارت و کارچی زُرت که وتی چُکّا هِلارَ کنان،
11 بله هُداوندئے پرێشتگا چه آسمانا اِبراهێم تئوار کرت:
”اِبراهێم!
او اِبراهێم!“
اِبراهێما پَسّئو دات:
”جی!“
12 پرێشتگا گوَشت:
”وتی دستا بدار و چُکّا هچّ مکن.
نون منَ زانان که تئو هُداتُرسے ائے، چێا که تئو چَکّ و پَد نبوتئے* و وتی بَچّ، وتی یکّێن چُکّ هم منا دات.“
13 اِبراهێما چمّ چست کرتنت و پُشتا چارِت، دیستی ته گوَرانڈے که کانٹی ڈَنگَران مان گیشّتگاَنت.
اِبراهێم شت، گوَرانڈی زُرت و وتی چُکّئے جاگها سۆچَگی کُربانیگ کرت.
14 اِبراهێما آ جاگهئے نام کرت ”هُداوند چار و گُزارَ کنت“* و تان مرۆچیگا گوَشگَ بیت که:
”هُداوندئے کۆهئے سرا، چار و گُزار کنگَ بیت.“
15 هُداوندئے پرێشتگا پدا اِبراهێم چه آسمانا گوانک جت.
16 گوَشتی:
”هُداوندَ گوَشیت:
’منا وتی سرئے سئوگند اِنت، تئو که وتی بَچّئے، وتی یکّێن چُکّئے دئیگا چَکّ و پَد نبوتئے،
17 من هم په راستی ترا برکتَ دئیان و تئیی نَسل و پَدرێچا انچۆ بازَ کنان که آسمانئے اِستار و تئیابئے رێک اَنت.
تئیی پُشپَد وتی دُژمنانی شهرانَ گِرَنت و وتی مِلکتَ کننت و
18 زمینئے سجّهێن کئوم تئیی پُشپَدئے سئوَبا برکتَ گرنت، چێا که تئو منی هبر زُرتگ.‘“
19 گڑا اِبراهێم وتی هزمتکارانی کِرّا پِر ترّت و آ، هۆریگا دێم په بێرشێبَها راه گپتنت.
اِبراهێم بێرشێبَها جَهمنند بوت.
ناهۆرئے چُکّ
20 چیزّے وهدا رَند اِبراهێمِش سهیگ کرت که مِلکَها هم چُکّ آورتگ، په تئیی برات ناهۆرا چُکّی پێدا کرتگ.
21 آییئے ائولی چُکّ اوز اِنت، اوزئے برات بوز و کِموییل اَنت، کِموییل، اَرامئے پت اِنت.
22 اے دگه چُکّی کِسِد و هَزۆ و پیلداش و یَدلاپ و بِتوێل اَنت.
23 چه بِتوێلا رِبِکّا پێدا بوت.
اِبراهێمئے برات ناهۆرئے اے هشتێن چُکّ چه مِلکَها پێدا بوتنت.
24 ناهۆرئے سُریَت* که نامی رَهومَه اَت، چه آییا تِبَه و گَهَم و تَهاش و ماکَه پێدا بوتنت.